O Concello de Santiago celebrará mañá pola tarde a sesión constitutiva do Consello Municipal de Mocidade, despois de aprobar o novo regulamento que rexerá o funcionamento deste órgano de participación, substituíndo o texto vixente dende o ano 2001. A reunión terá lugar no Centro Xove da Almáciga e marcará o inicio dunha nova etapa para este espazo consultivo.
A concelleira de Dereitos e Servizos Sociais, Promoción Económica e Xuventude, María Rozas, explicou que o Consello está pensado como “un espazo de encontro e coordinación entre o Concello e a mocidade, para favorecer a súa implicación activa na vida pública e canalizar as súas demandas co obxectivo tamén de facilitar a resposta por parte da administración local”.
O novo regulamento adapta o funcionamento do órgano á realidade social actual e á normativa autonómica en materia de xuventude. Entre os cambios máis relevantes figura a modificación da súa composición e a apertura das sesións á participación pública, con voz pero sen voto, de persoas con idades comprendidas entre os 14 e os 30 anos.
MAIOR PESO DOS CENTROS EDUCATIVOS E DA USC
Un dos elementos centrais da reforma é o incremento da presenza dos centros educativos e da Universidade de Santiago de Compostela no Consello. O órgano contará cun mínimo de cinco vogalías ocupadas por mozos e mozas escolarizados en 3º da ESO e cursos posteriores de educación secundaria, bacharelato ou formación profesional, sempre a partir dos 14 anos.
Cada centro educativo designará unha persoa titular e cando menos unha suplente. As persoas elixidas exercerán a súa función como representantes da súa franxa de idade ou do barrio, e non en nome do centro ao que pertencen.
No caso da Universidade, participará a través dunha persoa designada polo seu órgano de goberno e doutra proposta polo Consello do Estudantado, reforzando así a conexión entre o ámbito universitario e as políticas municipais de xuventude.
PARTICIPACIÓN DE ENTIDADES E COLECTIVOS
O regulamento tamén contempla a incorporación de entidades, asociacións ou colectivos xuvenís que formalicen a súa solicitude. Para iso deberán remitir os datos persoais e de contacto da persoa representante ao correo electrónico da Concellaría de Mocidade.
Así mesmo, incluirase unha persoa en representación da comunidade usuaria do Centro Xove de Creación Cultural da Almáciga, ampliando a diversidade de perfís presentes no órgano.
REPRESENTACIÓN INSTITUCIONAL E FUNCIONAMENTO
A composición complétase cunha persoa representante de cada grupo político con presenza na Corporación municipal. A presidencia corresponderá á alcaldesa ou á concelleira de Xuventude, mentres que a vicepresidencia será exercida de maneira rotatoria por unha das vogalías. A secretaría recaerá na persoa titular da Secretaría Xeral do Pleno ou en quen delegue.
