A catedrática en Óptica e candidata a reitora da Universidade de Santiago de Compostela, Maite Flores, reafirma o seu compromiso cun modelo de institución “de fronteira, aberta e con espírito de pertenza” de cara á segunda volta das eleccións, cuxa votación se celebrará o vindeiro 11 de marzo. Nunha entrevista con Europa Press, defende unha universidade internacionalizada e asegura que a súa candidatura nace dun “compromiso real coa institución” e do apoio dun equipo que quere definir a USC da próxima década.
Flores fai unha valoración positiva dos resultados da primeira volta, na que quedou en segunda posición, e destaca que a participación “lexitima os resultados”. No plano da xestión, aposta por unha remodelación administrativa —especialmente na área de investigación— e pola creación dunha Vicerreitoría de Economía que marque liñas claras de actuación, coa prioridade posta na estabilización do persoal. Ademais, sinala como reto clave a substitución xeracional ante as próximas xubilacións, para a que propón un modelo planificado que evite a perda de coñecemento.
En canto ao alumnado, subliña que debe ser o núcleo da universidade e defende residencias universitarias públicas e dignas para garantir a equidade. Sobre o Campus de Lugo, recoñece un sentimento de “desprotección” e comprométese a reforzar o seu papel dentro da USC. De cara á segunda volta, denuncia ataques persoais e bulos sufridos na campaña e chama á comunidade universitaria a comparar programas e decidir “que modelo de universidade quere para o futuro”.
