O Grupo Municipal Socialista levará ao pleno ordinario deste mes unha iniciativa para que o Concello de Santiagoasuma directamente a xestión do Servizo de Animación e Dinamización dos Centros Socioculturais no caso de que a actual licitación quede deserta. A formación considera que esta eventualidade evidenciaría problemas na tramitación do contrato por parte do executivo local.
A concelleira Marta Abal explicou que a proposta contempla que, “no caso de que a actual licitación do Servicio de Animación e Dinamización dos Centros Socioculturais quede deserta”, sexa o propio Concello quen “asuma directamente a xestión do servizo con carácter transitorio e ata a formalización dun novo contrato para restablecelo canto antes”. Segundo sinalou, o obxectivo é “garantir os dereitos das persoas usuarias e das traballadoras e traballadores do servizo”.
A edil indicou que esta fórmula non suporía unha novidade, xa que, segundo afirmou, “é posible e hai antecedentes recentes”. Ao seu xuízo, a situación actual require “valentía política e decisión” para desbloquear un escenario que cualificou de “límite”.
Desde o grupo socialista sitúan a iniciativa no contexto do funcionamento da rede municipal de centros socioculturais. Abal asegurou que “a situación que se está a vivir nos Centros Socioculturais é dramática” e afirmou que Santiago está “no peor momento da súa historia”, atribuíndo a responsabilidade ao Goberno local, integrado por BNG e Compostela Aberta.
Segundo detallou, existen “Centros Socioculturais sen actividades e máis de 60 traballadoras e traballadores, máis de 60 familias, atrapadas nun bucle sen saída, sen cobrar, é sen posibilidade de acceder á prestación por desemprego”. Para a concelleira, esta realidade pon de manifesto problemas de planificación e xestión por parte do executivo municipal.
A proposta que defenderá o PSdeG pasa por unha xestión directa de carácter provisional e limitada no tempo, unha medida que Abal definiu como “excepcional pero necesaria e con encaixe xurídico para saír deste bloqueo canto antes”. A concelleira sostivo que “non podemos seguir agardando” e que “hai que actuar xa con cabeza e con sentido común para recuperar o servizo e protexer a quen o sostén e a quen o necesita”.
O debate sobre esta iniciativa terá lugar no vindeiro pleno ordinario, no que se abordará a situación do servizo e as posibles alternativas para restablecer a actividade nos centros socioculturais da capital galega.
