A Xunta de Galicia destinará 230.000 euros á mellora das condicións térmicas e de climatización da residencia autonómica José Otero, situada en Santiago de Compostela. O obxectivo desta actuación é garantir unhas temperaturas idóneas en cada época do ano para que os residentes gañen en comodidade e benestar. A conselleira de Política Social e Igualdade, Fabiola García, visitou este domingo o centro para destacar o esforzo do Goberno galego no acondicionamento da rede pública de maiores. As obras, financiadas con fondos europeos NextGenerationEU, consistirán na substitución dos actuais equipos de climatización do soto por uns novos na cuberta, e o contrato atópase xa en fase de licitación cun prazo de execución de dous meses.
Doutra banda, a conselleira tamén avaliou o impacto do acordo alcanzado coa Federación Galega de Municipios e Provincias (Fegamp) para o aumento progresivo da achega autonómica ao Servizo de Axuda no Fogar (SAF). García cualificou de “histórico” este pacto, que suporá un incremento do 50% na achega da Xunta a este servizo municipal. No caso concreto de Boqueixón, o orzamento para o SAF aumentará en máis de 425.000 euros ao longo dos vindeiros tres anos, o que permitirá un aforro nas arcas locais e axudará a blindar o seu cociente de atención, que actualmente se sitúa nun notable 98%.
Durante a súa visita a Boqueixón, onde estivo acompañada polo alcalde Ovidio Rodeiro, a conselleira visitou os domicilios de dúas persoas dependentes para comprobar de primeira man o funcionamento deste servizo. Fabiola García incidiu en que o reforzo do SAF é fundamental para que os concellos poidan mellorar a prestación e garantir que as persoas maiores ou en situación de dependencia poidan seguir residindo nos seus fogares coa atención necesaria.
