O Concello de Ames vén de comunicar a suspensión temporal do servizo municipal de transporte adaptado logo de detectarse danos no vehículo que presta esta atención. Segundo informou a administración local, o autobús apareceu cun cristal roto, circunstancia que obriga a interromper o servizo ata que se realicen as reparacións necesarias.
Desde o goberno municipal sinalan que esta situación é consecuencia de feitos alleos á propia institución e expresan a súa “profunda preocupación e rexeitamento polos actos vandálicos” que deixaron fóra de funcionamento un recurso dirixido a persoas en situación de especial vulnerabilidade.
O transporte adaptado é un servizo prestado directamente polo Concello de Ames e constitúe, segundo subliña o executivo local, o único medio de mobilidade para moitas persoas con discapacidade ou mobilidade reducida do municipio. A súa función principal é facilitar os desprazamentos a tratamentos médicos e a outras xestións relacionadas coas necesidades básicas do día a día.
A suspensión implica unha afectación directa a persoas que non dispoñen de alternativas de transporte, polo que desde o Concello insisten na importancia de garantir a continuidade deste tipo de prestacións públicas. “A interrupción deste servizo municipal supón unha grave afectación para persoas especialmente vulnerables, que non dispoñen de alternativas de mobilidade”, trasladan fontes municipais.
En relación co contexto actual de mobilizacións laborais, o Concello manifesta que respecta “plenamente a folga como un dereito fundamental”, pero lembra que o seu exercicio non pode situarse por riba doutros dereitos considerados esenciais, especialmente os das persoas que dependen a diario deste servizo para manter a súa autonomía.
A administración local recalca que calquera reivindicación debe desenvolverse sen prexudicar a quen precisa dos servizos públicos para a súa vida cotiá e anuncia que informará da reanudación do transporte adaptado unha vez o vehículo estea en condicións de volver operar.
