A Universidade de Santiago de Compostela vén de activar o proceso de votación electrónica para a elección da nova reitora da institución académica. As urnas dixitais permanecerán abertas entre as 09:00 e as 18:00, segundo a comunicación remitida pola secretaría xeral da universidade.
O sistema permitirá emitir o voto a través da plataforma habilitada pola universidade, accesible desde o enderezo https://aplicacions.usc.es/axe/publica, empregando as credenciais persoais de cada membro do censo. A institución lembra que o acceso debe realizarse con identificación individual para garantir a validez do proceso.
Durante a xornada electoral, facilitaranse avances de participación en dous momentos concretos do día: ás 12:00 e ás 16:00. Estes datos poderán consultarse na páxina oficial destinada ao seguimento das eleccións. Unha vez concluído o horario de votación e rematado o escrutinio, os resultados finais publicaranse na web institucional da USC.
No caso de producirse incidencias técnicas ou dúbidas relacionadas co procedemento, a universidade habilitou o correo electrónico evoto@usc.es para a súa comunicación ao longo de toda a xornada.
As eleccións a reitora constitúe un dos procesos centrais no calendario institucional da USC, xa que determinará a dirección académica e estratéxica da universidade nos próximos anos.
ELECCIÓNS AO CLAUSTRO UNIVERSITARIO
Coincidindo coa votación para a reitoría, tamén se celebran as eleccións de representantes no Claustro Universitario, órgano de representación da comunidade académica. Este proceso forma parte da renovación dos cargos internos da universidade e desenvólvese igualmente mediante o sistema de voto electrónico habilitado para a xornada DE HOXE.
O Claustro é o máximo órgano de representación da USC, é elixido cada catro anos e nel están presentes os distintos sectores da comunidade universitaria, incluíndo persoal docente e investigador, estudantado e persoal técnico, de xestión e administración e servizos.
