O Centro Galego de Arte Contemporánea (CGAC) abriu a súa programación expositiva de 2026 coa inauguración de ‘Internalities. Arquitecturas para un equilibrio territorial‘, un proxecto que chega a Galicia tras representar a España na Bienal de Arquitectura de Venecia. A mostra poderá visitarse ata o 3 de maio nas instalacións do museo.
A exposición, impulsada polo Goberno central en colaboración con Acción Cultural Española, estrutúrase en dúas áreas diferenciadas. A primeira delas, baixo o título ‘Balance’, reúne 16 obras construídas vinculadas á arquitectura, o paisaxismo e o espazo público, que propoñen diferentes aproximacións á relación entre territorio, deseño e contexto social.
O segundo ámbito da mostra céntrase na investigación e aborda cinco eixos considerados clave para a redución das emisións no sector da construción: materiais, oficios, enerxías, residuos e emisións. Cada un destes campos analízase desde a perspectiva de cinco xeografías distintas da península ibérica e está coordinado por equipos de arquitectos e investigadores especializados tanto nas temáticas como nos territorios estudados.
Ao acto de inauguración, celebrado este venres no CGAC, asistiu o conselleiro de Cultura, José López Campos, quen salientou a capacidade da exposición para “mirar aos desafíos aos que deben responder as novas xeracións de arquitectos que se mostran sensibilizados coa realidade ambiental”.
Durante a súa intervención, o conselleiro agradeceu e felicitou aos comisarios da mostra, os arquitectos galegos Manuel Bouzas e Roi Salgueiro, por concibir un “espazo de encontro” entre profesionais e público que favorece o intercambio de ideas e o diálogo arredor dos retos contemporáneos da arquitectura, co obxectivo de “seguir avanzando social e culturalmente”.
López Campos tamén fixo referencia ao recoñecemento recente do CGAC por parte do Observatorio da Cultura, que distinguiu o centro como “insignia da cultura galega”, unha valoración que cualificou como unha “honra” para a institución e para o conxunto do sector cultural galego.
