O Goberno local de Santiago de Compostela iniciou os primeiros contactos coa segunda empresa clasificada no proceso de adxudicación do contrato de dinamización e mediación da rede de centros socioculturais, un dos tres lotes nos que se dividirá a xestión deste servizo municipal. A decisión prodúcese despois de que a empresa Eulen, á que se lle adxudicara o contrato o pasado 21 de xaneiro, renunciase á súa formalización a poucos días de rematar o prazo para a sinatura.
Ante esta situación, a alcaldesa, Goretti Sanmartín, explicou en rolda de prensa que o Concello está a analizar “todas as vías legais posibles” para impoñer penalidades á empresa adxudicataria pola súa renuncia. A mandataria cualificou a decisión de Eulen como “inexplicable” e sinalou que as xustificacións achegadas “non convencen nin se entenden”, ao tempo que definiu a actuación como “unha actuación de irresponsabilidade”.
Segundo indicou, o Executivo municipal puxo xa en marcha o procedemento administrativo necesario para que a segunda empresa poida asumir o contrato, co obxectivo de que “canto antes poida haber unha nova adxudicación”. Mentres tanto, Sanmartín precisou que o servizo segue en funcionamento a través dunha empresa en réxime de continuidade, e que se está a avaliar “a posibilidade de continuidade ou non ata que outra empresa se faga cargo” da xestión definitiva.
A alcaldesa confirmou tamén que o Goberno local mantivo contactos cos representantes do persoal afectado, aos que lles trasladou a súa “preocupación” pola situación e a súa “intención” de resolver o proceso coa maior celeridade posible para garantir tanto o servizo como os dereitos laborais.
