O grupo municipal socialista de Santiago criticou este martes a situación da Casa da Xuventude, un inmoble situado no barrio de San Pedro, no casco histórico da cidade, que permanece sen uso e en proceso de deterioro tras a renuncia do Goberno local ao convenio asinado coa Deputación da Coruña para a súa rehabilitación. Así o manifestou en rolda de prensa a concelleira do PSdeG Marta Abal, quen cualificou aquela decisión, adoptada en setembro de 2023, como unha oportunidade perdida para a cidade.
Segundo lembrou Abal, o acordo pechado na anterior lexislatura contemplaba un investimento superior ao millón de euros por parte da Deputación, así como a asunción dos custos de mantemento e conservación do edificio durante un período de 25 anos, o que, ao seu xuízo, tería suposto un alivio económico para as arcas municipais. A edil sinalou que, dende o momento en que o Goberno bipartito decidiu abandonar o convenio, “o edificio quedou empantanado, sen avances e deteriorándose a pasos axigantados”.
A concelleira socialista explicou que o proxecto previsto non se limitaba a unha intervención superficial, senón que incluía unha transformación urbana de calado. Entre outras actuacións, contemplábase a apertura dun concurso de ideas para mellorar a integración da fachada coa praza, o rebaixe da altura do inmoble, a creación dun novo acceso ao parque de Belvís e o acondicionamento integral do edificio.
En canto aos usos, Abal detallou que a proposta incluía unha oficina de recadación da Deputación na planta baixa, un espazo de coworking e dinamización económica no primeiro andar, dependencias municipais no segundo e a modernización do auditorio, cunha capacidade superior ás 250 persoas, destinado a actividades culturais, formativas e sociais. Un conxunto de funcións que, segundo indicou, combinaban servizo público, impulso económico e mellora da contorna urbana.
A representante do PSdeG criticou que, transcorrida xa máis da metade da lexislatura, o Goberno municipal non presentase “nin proxecto, nin calendario, nin proposta alternativa” para este inmoble. Na súa intervención, lamentou o que cualificou como un “silencio” por parte do Executivo local, mentres o edificio continúa deteriorándose no centro da cidade.
Neste contexto, Abal avanzou que o grupo socialista propuxo, no marco da negociación dos orzamentos municipais de 2026, recuperar o proxecto de rehabilitación da Casa da Xuventude e definir con claridade os seus usos futuros. A concelleira advertiu de que Santiago “non pode permitirse perder fondos por falta de acción ou de visión”, e puxo este caso como exemplo doutras perdas de financiamento público rexistradas nos últimos anos.
Dende o PSdeG consideran que a recuperación deste equipamento público no barrio de San Pedro debe ser unha prioridade municipal, especialmente nun contexto no que o propio Goberno local defende a necesidade de novos espazos públicos. A formación socialista insiste en que a situación actual da Casa da Xuventude require unha resposta urxente para evitar un maior deterioro dun edificio situado nun punto estratéxico da cidade.
