A alcaldesa de Santiago, Goretti Sanmartín, participou este luns na recepción do xurado do concurso internacional de iluminación ornamental da contorna da Catedral de Santiago, un proceso no que se avaliaron 21 propostas procedentes de distintos equipos e do que resultaron tres proxectos finalistas. O xurado reuniuse na xornada de hoxe para deliberar e escoller a proposta gañadora, que se executará como proxecto piloto na Praza das Praterías, co obxectivo de servir de referencia para unha intervención máis ampla na paisaxe nocturna do corazón histórico da cidade.
Sanmartín cualificou a xornada como “un día chave” dentro do proceso de redefinición da iluminación do centro histórico e agradeceu o traballo do xurado, así como a participación de todas as persoas e equipos que concorreron ao certame. Segundo explicou, a elevada participación “demostra que hai moitas ideas e alternativas” e reforza a aposta municipal por convocar concursos abertos no marco do plan de sustentabilidade turística.
A alcaldesa salientou que as propostas finalistas destacan pola súa calidade técnica e pola atención a criterios como a estratexia lumínica, a integración paisaxística, a viabilidade económica e o respecto patrimonial. Nesa liña, indicou que o obxectivo é acadar un equilibrio entre a iluminación dos espazos monumentais e a creación dunha atmosfera de “acougo, tranquilidade e descanso”, coherente coa identidade da cidade histórica.
Pola súa banda, o arquitecto municipal Javier García Castelo, membro do xurado, explicou que a selección das tres propostas responde á necesidade de axustarse ás esixencias dun ámbito especialmente protexido. Segundo detallou, moitas das candidaturas presentaban solucións atractivas desde o punto de vista tecnolóxico ou de deseño, pero non todas resultaban compatibles coa protección da imaxe tradicional da cidade. As finalistas, afirmou, son as que mellor cumpren os criterios de respecto polo patrimonio e pola paisaxe urbana que se pretende conservar.
García Castelo destacou tamén o carácter multidisciplinar do xurado, no que participan especialistas en iluminación e en intervención no patrimonio histórico, así como persoal técnico municipal coñecedor da realidade urbana de Santiago, o que, ao seu xuízo, facilitará unha decisión consensuada sobre a proposta gañadora.
A arquitecta Teresa Táboas, vicepresidenta do Grupo Internacional de Arquitectos e integrante do xurado, puxo en valor a convocatoria dun concurso internacional deste tipo para un dos conxuntos monumentais máis relevantes a nivel mundial. Táboas sinalou que a iniciativa sitúa Santiago como referente na reflexión sobre a iluminación do patrimonio histórico e sobre o chamado urbanismo nocturno, nun contexto no que as cidades tamén se viven durante a noite.
Na súa intervención, subliñou a complexidade técnica de iluminar unha arquitectura histórica, concibida nun tempo no que non existía a luz artificial, e destacou a importancia de ter en conta factores como a atmósfera, as condicións climáticas, o comportamento do granito e as variacións cromáticas que se producen coa humidade e a choiva, elementos característicos da cidade.
Táboas amosou a súa sorpresa pola calidade xeral das propostas presentadas e considerou que o proxecto gañador pode converterse nun referente internacional para futuras intervencións en conxuntos históricos doutros lugares. Segundo indicou, a experiencia de Santiago pode marcar un punto de partida para novas formas de entender a iluminación patrimonial a nivel global.
O Concello prevé dar a coñecer nas vindeiras horas a proposta seleccionada, que servirá como modelo para avanzar na definición dunha nova paisaxe nocturna no centro histórico compostelán.
