Dous investigadores da Universidade de Santiago de Compostela acusaron á institución de “impor unilateralmente” un límite dunha única candidatura por área de coñecemento nas axudas para a etapa de formación posdoutoral da Xunta. Os afectados cualificaron esta situación como “grave, irregular e potencialmente ilegal” nunha queixa difundida aos medios de comunicación.
Segundo explicaron os investigadores, nesta convocatoria concorren as universidades públicas de Galicia, “pero só a de Santiago establece un límite de candidaturas que poden presentar”, advertindo ademais de que “non é a primeira vez que pasa”. A Xunta convocou estas axudas en réxime de concorrencia competitiva, e a normativa da convocatoria non establece ningún límite no número de solicitudes que unha entidade poida presentar, nin por institución nin por área de coñecemento.
“A pesar disto, a USC comunicou internamente que imporía unilateralmente un límite dunha única candidatura por área de coñecemento, restrinxindo a presentación de solicitudes e deixando fóra potenciais candidatos que cumprían os requisitos legais e científicos”, denunciaron. Lamentaron que esta decisión vulnera os principios de igualdade, mérito e capacidade e supón unha restrición non prevista nas bases da Xunta, o que afecta directamente a investigadores en situación de “alta precariedade laboral e dependencia”.
POSTURA DA USC
Pola súa banda, fontes da USC anunciaron que todas as persoas interesadas poderán propor a súa candidatura polas áreas de coñecemento que consideren oportunas, polo que finalmente non existiría esa limitación dunha soa candidatura. “Tal prelación será remitida á subárea de convocatorias e programas de recursos humanos polos departamentos e as áreas de coñecemento deberán establecer unha orde priorizada das candidaturas presentadas”, debullaron.
Con todo, subliñaron que o criterio xeral da Universidade é presentar unha candidatura por área “sen prexuízo de que á vista do número de candidaturas presentadas e das áreas afectadas se poidan seleccionar máis dunha candidatura“. Así mesmo, insistiron en que tamén se terá en conta o currículo das candidaturas, tentando presentar todas aquelas que conten con méritos destacados.
