Miles de persoas saíron este domingo ás rúas de Santiago de Compostela para denunciar os “continuos colapsos” da sanidade pública galega e reclamar un sistema sanitario público e de calidade. A mobilización, convocada pola plataforma SOS Sanidade Pública, desenvolveuse nunha xornada marcada pola choiva e reuniu manifestantes chegados de distintos puntos de Galicia.
A marcha percorreu varias rúas do centro da cidade ata concluír na Praza do Obradoiro, onde se procedeu á lectura dos manifestos. Durante o percorrido, escoitáronse consignas como “coa nosa saúde non se xoga” e “queremos máis sanidade pública e de calidade”, nunha protesta centrada nas listas de espera, a situación da Atención Primaria e o funcionamento dos servizos de Urxencias.
A cabeceira da manifestación estivo integrada pola portavoz nacional do BNG, Ana Pontón; o secretario xeral do PSdeG, José Ramón Gómez Besteiro, e o secretario xeral de Movemento Sumar Galicia, Paulo Carlos López, xunto a outros representantes políticos e sociais.
Durante a mobilización, Ana Pontón responsabilizou ao PP do que cualificou como “17 anos de recortes” na sanidade pública galega e acusou ao Goberno autonómico de “querer deteriorar a sanidade pública para beneficiar á privada”. A líder nacionalista exemplificou esta situación coa presenza de pacientes nos corredores dos hospitais e co tempo de espera para unha cita en Atención Primaria, que situou en “case un mes”, unha realidade que, segundo sinalou, “pon en risco” a saúde da poboación.
Pontón tamén fixo referencia aos recursos económicos, ao asegurar que mentres se produciron recortes en Atención Primaria, incrementouse o investimento na sanidade privada ata acadar 341 millóns de euros. Neste contexto, pediu ao presidente da Xunta, Alfonso Rueda, que “rectifique” e atenda o “clamor” da cidadanía, que, segundo dixo, está “farta de colapsos en Urxencias e Atención Primaria”.
Pola súa banda, o secretario xeral do PSdeG advertiu do que definiu como un “verdadeiro caos” no sistema sanitario galego. Gómez Besteiro afirmou que a situación non responde a problemas puntuais, senón a unha cuestión “estrutural”, e alertou do risco de que Galicia avance cara a un modelo de privatización semellante ao doutras comunidades. O líder socialista apuntou cifras como as de 360.000 persoas á espera dunha cita médica e os 12.000 nenos e nenas que deben desprazarse quilómetros para recibir atención pediátrica, ademais do colapso das Urxencias.
Desde Movemento Sumar Galicia, Paulo Carlos López reclamou a dimisión do conselleiro de Sanidade, Antonio Gómez Caamaño, ao que cualificou de “incapaz” e ao que atribuíu unha “estratexia deliberada de privatización”. Segundo expuxo, esta política situou á sanidade pública galega na “peor situación dos últimos 30 anos”. López describiu un escenario de Atención Primaria e Urxencias colapsadas e anunciou a proposta dun plan de choque, que inclúe medidas de transparencia nas listas de espera e a convocatoria urxente de mil prazas de emprego sanitario.
