O BNG de Ames situou o acceso á vivenda como unha das prioridades da súa acción política no concello, defendendo a necesidade de garantir condicións adecuadas e accesibles para toda a veciñanza. A formación nacionalista lembrou que leva meses formulando propostas para facer fronte á crise habitacional que afecta ao municipio.
No pleno municipal de maio de 2025, o grupo nacionalista presentou unha moción na que reclamaba frear o incremento dos prezos do alugueiro, facilitar o acceso social á vivenda, iniciar os trámites para declarar Ames como zona tensionada e adoptar medidas contra a proliferación das vivendas de uso turístico (VUT). Esta iniciativa non saíu adiante ao non contar co apoio nin do PSOE nin do PP, o que, segundo o BNG, impediu a posta en marcha destas actuacións.
Como parte deste traballo, en setembro de 2025 o BNG organizou unha xornada sobre vivenda no Milladoiro, na que participaron persoas expertas e veciñanza para analizar a situación actual e debater sobre posibles modelos de futuro. Nese encontro, destacou a idea de que “Non podemos permitir que a vivenda se convirta nunha simple mercadoría, para o BNG de Ames é preciso blindar o dereito de acceso de todas as persoas a unha vivenda digna e adecuada que satisfaga as súas necesidades básicas”.
A acción política da formación tamén se trasladou ao ámbito europeo. A voceira do BNG de Ames, Escarlata Pampín, desprazouse a Bruxelas para manter unha reunión coa Comisión de Vivenda do Parlamento Europeo, onde expuxo a situación da veciñanza amesá e demandou o dereito a unha vivenda digna, sostible e accesible. Na xuntanza abordáronse cuestións como a existencia de vivenda baleira, a escaseza de parque público, o impacto das vivendas turísticas e as dificultades da xente nova e traballadora para acceder a un fogar.
Desde o BNG reiteran que continuarán reclamando actuacións ás distintas administracións. “Nós imos seguir esixindo medidas firmes de todas as administración porque non imos permitir que a vivenda se convirta nunha simple mercadoría, sempre protexeremos o dereito á vivenda en Ames”, subliñou Pampín.
