UCIN Santiago vén de defender a creación da figura do Axente Cívico como unha medida preventiva orientada a mellorar a convivencia cidadá, ofrecer información ás persoas visitantes e coidar o espazo público durante os períodos de maior afluencia turística en Santiago de Compostela.
Segundo explica a formación, en momentos como a Semana Santa, o verán ou os Anos Xacobeos rexístranse situacións de saturación, desinformación e pequenos conflitos de convivencia que non sempre atopan resposta eficaz unicamente a través de sancións. Neste contexto, UCIN aposta por un modelo alternativo que poña o acento na educación, a prevención e a mediación como ferramentas principais.
A proposta contempla que os Axentes Cívicos desenvolvan funcións centradas en orientar ás persoas visitantes sobre as normas básicas de convivencia e o uso do espazo público, previr comportamentos incívicos mediante unha presenza activa baseada no diálogo e a proximidade, así como actuar como mediadores entre a veciñanza, o turismo e o comercio local. Ao mesmo tempo, esta figura contribuiría a reforzar a imaxe dunha cidade acolledora e respectuosa, afastada dun enfoque exclusivamente represivo.
Desde UCIN Santiago sinalan que estes profesionais deberían contar con formación específica en atención ao público, idiomas, patrimonio e convivencia urbana, e que a súa actividade se concentraría nas zonas da cidade con maior presenza de visitantes. O obxectivo sería actuar de maneira anticipada ante posibles conflitos e facilitar información útil tanto a turistas como á cidadanía.
“Non se trata de multar máis, senón de explicar mellor. A educación e a información funcionan mellor ca a sanción cando falamos de convivencia”, indican desde a formación política.
