A Real Filharmonía de Galicia vén de presentar ‘Ao lonxe’, un novo programa da súa tempada de abono que sitúa o violín no centro da proposta artística coa participación de Raquel Areal como solista convidada. Os concertos celebraranse o xoves 29 de xaneiro en Santiago e o venres 30 de xaneiro no Centro Cultural Afundación de Vigo, baixo a dirección do seu director titular e artístico, Baldur Brönnimann.
O programa abrirase coa estrea absoluta de ‘Muffled cry’, unha nova composición de Voro García, creada por encargo da Real Filharmonía no marco do proxecto ‘Cometas’, unha iniciativa orientada a impulsar a creación contemporánea e a integrar a obra de compositores actuais na programación regular da orquestra. A presenza do autor permitirá achegar ao público o proceso creativo desta nova partitura.
Na continuación do concerto interpretarase o Concerto para violín nº 2 de Serguéi Prokófiev, composto en 1935, nun momento clave da traxectoria do autor, pouco antes do seu regreso definitivo á Unión Soviética. Trátase dunha obra escrita case tres décadas despois do seu primeiro concerto para este instrumento e que foi o último encargo procedente do ámbito occidental, estreada en Madrid cunha instrumentación singular que incluía castañolas.
A segunda parte do programa estará dedicada á Sinfonía nº 2 de Jean Sibelius, escrita en 1902 tras unha estancia do compositor en Italia. A obra estrutúrase en catro movementos e combina unha linguaxe formal de carácter clásico cunha ampla expresividade melódica, converténdose nunha das sinfonías máis recoñecidas do repertorio nórdico.
A dirección musical corresponderá a Baldur Brönnimann, á fronte da Real Filharmonía de Galicia, cunha traxectoria recoñecida pola súa especialización no repertorio dos séculos XX e XXI, así como pola súa atención ao gran repertorio sinfónico. Como solista actuará Raquel Areal, violinista galega que desde maio de 2025 forma parte da Filharmónica de Berlín, sendo a primeira intérprete galega en incorporarse a esta formación. A súa carreira inclúe estudos na Escola Superior de Música Reina Sofía e na Hochschule für Musik Hanns Eisler de Berlín, ademais de colaboracións con directores e solistas de proxección internacional.
Antes do concerto en Santiago, o xoves 29 de xaneiro ás 19:45, celebrarase o encontro ‘Conversando con…’ na Sala Mozart do Auditorio de Galicia, unha sesión aberta ao público na que se presentarán as claves do programa e se abordará o proceso creativo da obra de estrea.
As entradas para o concerto de Santiago teñen un prezo de 18 euros, con descontos do 50% para persoas desempregadas, perceptoras de rendas sociais, maiores de 65 anos, estudantes, menores de 25 anos e membros de familias monoparentais ou numerosas. Poden adquirirse a través da web de Compostela Cultura, no despacho de billetes da Zona C e no do Auditorio, neste último caso só o día do concerto desde unha hora antes do seu inicio. Para a actuación de Vigo, as entradas están dispoñibles na plataforma Ataquilla desde 13,30 euros.
