O programa de aceleración para a internacionalización de pemes galegas innovadoras e/ou de base tecnolóxica ‘Galicia Avanza’ afronta a súa cuarta edición coa selección de 30 empresas de toda a comunidade. A iniciativa xorde da colaboración entre a Consellería de Economía e Industria, o Instituto Galego de Promoción Económica (Igape) e o Parque Tecnolóxico de Galicia – Tecnópole, entidade responsable da súa xestión e coordinación.
Durante os últimos meses, as empresas participantes desenvolveron un programa integral de apoio á internacionalización, con itinerarios personalizados adaptados ás necesidades de cada proxecto. Entre as compañías seleccionadas atópase Bodegas Lodeiros, unha adega con sede en Santiago de Compostela, dedicada á elaboración artesanal de vermú galego premium.
No marco deste proceso, a adega vén de acadar un recoñecemento internacional no International Wine Challenge 2026, un dos concursos máis prestixiosos do sector que se celebra en Londres e no que expertos de distintos países avalían, mediante catas a cegas, referencias procedentes de máis de 50 estados. Os vermús de Bodegas Lodeiros obtiveron tres medallas de prata, sendo ademais a única marca de vermú premiada nesta edición.
O vermú mellor puntuado foi o vermello, con 94 puntos sobre 100, quedando a un punto do ouro. Tamén foron distinguidos o vermú vermello sen azucres engadidos, con 93 puntos, e o vermú branco, que alcanzou 90 puntos. Segundo explicou o CEO da empresa, Pablo Lodeiros, “este recoñecemento chega nun momento clave para Bodegas Lodeiros, que mantén o seu compromiso cunha elaboración ligada á identidade galega, combinando tradición e unha aposta sostida por prácticas responsables”. Engadiu que “esta distinción, recibida nunha contorna internacional tan esixente, supón un respaldo ao traballo do equipo e ao percorrido da marca no desenvolvemento de vermús con carácter propio”.
Dende a adega sinalan tamén que “a obtención destas medallas reforza o interese crecente polos vermús de calidade no panorama gastronómico actual”, un contexto no que a coctelería, o aperitivo e os produtos con orixe definida gañan presenza tanto na hostalaría como entre os consumidores.
TECNÓPOLE
O Parque Tecnolóxico de Galicia – Tecnópole é unha sociedade participada pola Xunta de Galicia a través da Consellería de Economía e Industria. Situado no concello ourensán de San Cibrao das Viñas, acumula máis de tres décadas de traxectoria impulsando a innovación, cun centenar de empresas tecnolóxicas e diversos centros de I+D. A entidade mantén un compromiso activo co desenvolvemento sustentable, a igualdade de xénero e a divulgación científica.
