O Concello de Santiago de Compostela abriu este venres o prazo de inscrición para o desfile-concurso do Entroido 2026, logo da publicación das bases no Boletín Oficial da Provincia. As persoas interesadas poderán presentar as súas solicitudes desde este sábado, 24 de xaneiro, e até o 30 de xaneiro, a través da sede electrónica municipal ou por calquera dos procedementos recollidos no artigo 16.4 da Lei 39/2015.
A principal novidade desta edición é o incremento da dotación económica, que pasa de 14.000 a 16.000 euros. O maior aumento concéntrase na categoría de comparsas do Concello, cuxos premios se equiparan por primeira vez aos das agrupacións procedentes doutros municipios. O primeiro premio á mellor comparsa establécese en 1.600 euros.
As bases introducen tamén un cuarto premio, dotado con 700 euros, ampliando así o número de recoñecementos. No apartado de carrozas, o primeiro premio ascende a 2.000 euros. En canto aos disfraces, o mellor de grupo recibirá 700 euros, mentres que os disfraces individual e de parella contarán cun premio de 300 euros cada un.
Outra das incorporacións deste ano é a creación dunha categoría específica para centros de ensino, que contará con dous premios: un primeiro de 500 euros e un segundo de 300 euros, co obxectivo de fomentar a participación da comunidade educativa no Entroido compostelán.
A valoración das propostas corresponderá a un xurado, que terá en conta criterios como o deseño, a composición, o colorido, a investigación, a orixinalidade, a imaxinación, así como a posta en escena, a coreografía e a harmonía do conxunto.
O desfile do Entroido celebrarase o martes 17 de febreiro, con inicio ás 17:30 na Avenida de Ferrol. Desde alí, o percorrido avanzará polas rúas Frei Rosendo Salvado, Praza Roxa, República do Salvador, Hórreo e Senra, para concluír na avenida de Xoán Carlos I, no centro de Santiago de Compostela.
