A alcaldesa de Santiago de Compostela, Goretti Sanmartín, trasladou este domingo “toda a solidariedade” da cidade coa provincia de Córdoba tras o grave accidente ferroviario rexistrado no municipio de Adamuz.
“Dende Santiago, onde infelizmente sabemos o que significa un grave accidente ferroviario, toda a solidariedade con Córdoba, familiares das vítimas e persoas afectadas polo accidente de Adamuz”, expresou a rexedora municipal nunha mensaxe pública difundida dende o goberno local.
Segundo fontes municipais, a alcaldesa mantense pendente da evolución do sinistro e está a manter contactos con outros rexedores a través da rede de Cidades Patrimonio, no marco da coordinación institucional entre cidades para trasladar apoio e acompañamento ás persoas afectadas.
Dende o Concello de Santiago subliñaron o carácter institucional da mensaxe de solidariedade e lembraron que a cidade compostelá viviu no pasado un grave accidente ferroviario, unha circunstancia que, segundo indicaron, explica a especial sensibilidade do goberno local ante este tipo de sucesos tráxicos.
PÉSAME DAS VÍTIMA DE ANGROIS
Pola súa banda, a plataforma de vítimas do accidente do tren Alvia 04155, que tivo lugar hai 13 anos en Santiago de Compostela, trasladan o seu “máis sentido pésame e solidariedade a todas as persoas afectadas pola traxedia ferroviaria de Adamuz”.
“Acompañamos a vítimas e familiares neste momento de profunda dor e pómonos á súa disposición, desde o máximo respecto e compromiso coa dignidade, a verdade e a xustiza”, sinala a asociación nun breve comunicado remitido á prensa.
“Confiamos en que se lles preste toda a atención e o apoio que necesitan”, destaca a nota, que conclúe insistindo en mandar todo o seu “ánimo e apoio aos afectados”.
CONVOCATORIA DE MINUTO DE SILENCIO
Ás 12:00 do mediodía, o Concello de Santiago convoca un minuto de silencio na Praza do Obradoiro en apoio ás vítimas do accidente de Adamuz.
