O portavoz do PP de Santiago, Borja Verea, mantivo unha xuntanza con arredor de 30 hoteleiros e hostaleiros da cidade, na que tamén participou o Xosé Manuel Merelles, director xeral de Turismo de Galicia. O encontro tivo como obxectivo analizar polo miúdo os retos turísticos aos que se enfronta a capital galega e avaliar a evolución recente do sector.
Segundo trasladou Verea, durante a reunión insistiu “na necesidade da posta en marcha de medidas urxentes de apoio á industria turística compostelá”, en resposta á preocupación manifestada polos profesionais ante a evolución dos datos de ocupación. O edil popular defendeu que Santiago debe reforzar a súa capacidade de atracción de visitantes, ao entender que a relación coa acollida forma parte da identidade histórica da cidade.
Verea sinalou que, ao seu xuízo, o actual goberno municipal de BNG e CA considera os visitantes como un problema, fronte á postura do seu grupo, que defende que “o que fai especial e único a Santiago é a súa relación con eles”. Na xuntanza estivo acompañado polos concelleiros María Baleato e José Antonio Constenla.
O portavoz popular lamentou que Santiago non sexa, neste momento, o destino con mellores condicións para recibir visitantes en Galicia, e puxo como exemplo o peche temporal do hotel AC del Carmen, un establecemento de cinco estrelas pertencente a unha cadea internacional, feito que cualificou de significativo para o sector. Ao respecto, afirmou que “non compartimos que teñamos un problema co turismo como en Málaga ou Londres, porque estamos ante realidades completamente diferentes”, e reiterou a necesidade de reforzar a industria turística local.
Verea asegurou que leva meses reclamando ao goberno municipal que aclare se aposta ou non pola chegada de visitantes, e vinculou a situación actual a un descenso progresivo da ocupación hoteleira, que, segundo indicou, vén sendo advertido polo sector desde o verán. Na súa intervención, acusou ao executivo local de ignorar datos oficiais e de contribuír, ao seu entender, a unha perda de viaxeiros e de actividade económica vinculada ao turismo.
Pola súa banda, o director xeral de Turismo de Galicia, Xosé Manuel Merelles, coincidiu en amosar a súa preocupación polo descenso da ocupación hoteleira en Santiago, que atribuíu “fundamentalmente á falta dunha oferta complementaria que atraia visitantes todos os meses do ano”. Merelles lembrou que o último mes no que medrou a ocupación foi xuño, coincidindo coa celebración do festival O Son do Camiño, e subliñou a importancia de diversificar a programación e os atractivos turísticos ao longo de todo o calendario para mellorar os resultados do destino compostelán.
