O Partido Popular de Santiago celebrou este xoves na súa sede compostelá un coloquio e mesa redonda baixo o título ‘Necesitamos gobernos útiles e decentes’, un acto que serviu para retomar as actividades do espazo ‘CompArte’, no que xa se desenvolveran encontros similares en etapas anteriores.
No encontro participaron o secretario xeral do PP, Miguel Tellado, e o presidente local da formación, Borja Verea, diante de militantes e simpatizantes do partido.
Na súa intervención, Tellado animou á organización a traballar para ofrecer á cidadanía unha “alternativa de esperanza” e defendeu que o PP é o “partido das propostas e non das protestas”. O dirixente popular apostou por transformar “o hastío, o hartazgo e o cabreo” dunha parte da poboación en “ilusión por cambiar as cousas”, nun proxecto que, segundo indicou, estaría liderado por un presidente “honesto” como Alberto Núñez Feijóo.
Tellado cualificou o actual exercicio político como un ano “decisivo” e asegurou que a lexislatura estatal se atopa “no final da partida”. Neste contexto, marcou como obxectivo para os próximos meses obter amplas vitorias electorais fronte ao PSOE en distintas comunidades autónomas, co fin de sentar as bases dun cambio político a nivel estatal e impulsar reformas en ámbitos como a vivenda, a fiscalidade ou o funcionamento das institucións.
Pola súa banda, Borja Verea centrou boa parte da súa intervención na situación política municipal en Santiago de Compostela. O presidente local do PP afirmou que a cidade necesita “gobernos útiles e decentes” e criticou o que cualificou como unha falta de eficacia na xestión actual do Concello. Segundo Verea, o BNG mantén a alcaldía grazas ao apoio do PSOE, unha situación que, ao seu xuízo, condiciona a acción de goberno.
Durante o acto, Verea acusou o executivo municipal de priorizar cuestións simbólicas fronte á xestión dos servizos públicos e asegurou que, nos últimos anos, se incrementou o número de asesores e cargos directivos no Concello. Neste sentido, afirmou que Santiago se converteu nunha “axencia de colocación” e cifrou en dous millóns de euros anuais o custo destes postos, segundo os seus datos.
O líder popular tamén se referiu ao proxecto de orzamentos municipais para 2026, asegurando que a principal medida recadatoria pasa por incrementar de maneira significativa os ingresos procedentes das multas de tráfico. Ademais, criticou a situación da limpeza urbana, o estado das rúas e beirarrúas e a política municipal en materia de seguridade cidadá.
Verea concluíu a súa intervención sinalando que o vindeiro ano será “complicado”, pero tamén “clave” para o futuro político da cidade, e chamou á militancia a intensificar o traballo co obxectivo de mellorar os resultados electorais do PP en Santiago.
