A Policía Local de Santiago conta desde este martes cunha nova inspectora principal, a única muller que ocupa este posto en toda Galicia. Trátase de Diana Parente Pampín, quen suma un novo fito á súa traxectoria profesional dentro do corpo municipal de seguridade, despois de ter sido a primeira muller oficial en 2013 e a primeira inspectora en 2019.
A alcaldesa de Goretti Sanmartín e o concelleiro de Convivencia, Xan Duro, recibiron hoxe no Concello á nova inspectora principal e aos catro inspectores que veñen de ser nomeados na Xunta de Goberno celebrada onte. Durante o encontro, os responsables municipais trasladáronlles os seus mellores desexos nesta nova etapa profesional e agradeceron a súa traxectoria no servizo público.
Ademais do nomeamento de Parente Pampín, a Xunta de Goberno acordou a incorporación de catro novos inspectores: Sergio Mariño Ruza, José Noya Vázquez, José Luis Castro Eitor e Antonio Malvido Lojo. Todos eles superaron o proceso selectivo de acceso por promoción interna e mobilidade á categoría de inspector nos corpos da Policía Local de Galicia, convocado de maneira unitaria pola Academia Galega de Seguridade Pública.
No caso da nova inspectora principal, o acceso produciuse tamén por promoción interna dentro da escala executiva dos corpos da Policía Local de Galicia. Para esta categoría ofertáranse dúas prazas, e Parente Pampín converteuse na única muller inspectora principal en activo en Galicia e na primeira que accede a este nivel profesional procedente da escala básica, ao abeiro do establecido na Lei 4/2007 de coordinación das Policías Locais de Galicia.
