As obras de renovación do pavimento da pista do Aeroporto de Santiago-Rosalía de Castro comezarán este martes, 13 de xaneiro, cunha primeira fase que se desenvolverá en horario nocturno, segundo informou Aena nun comunicado remitido este xoves. As actuacións realizaranse entre as 23:30 e as 05:30, co obxectivo de minimizar o impacto na operativa habitual do aeroporto.
Esta fase inicial prolongarase ata o 22 de abril. A partir desa data, os traballos continuarán en horario diúrno, o que implicará o peche completo da infraestrutura aeroportuaria durante 35 días, desde o 22 de abril ata o 27 de maio, segundo a planificación establecida.
A actuación foi adxudicada a finais do pasado mes de xullo ás empresas Padecasa Obras e Servizos SA, Infraestruturas Conelsan SA e F. Gómez e Cía SL, por un importe total de 26,6 millóns de euros. O prazo global de execución das obras está fixado en 15 meses.
Desde Aena sinalan que, nos últimos meses, se levaron a cabo as comunicacións necesarias coas compañías aéreas, os axentes que operan no aeroporto e as administracións e institucións locais, co fin de informar sobre as actuacións previstas. Segundo indica o xestor aeroportuario, este traballo previo permitiu analizar o impacto do proxecto e coordinar o desenvolvemento das obras para reducir as afeccións á actividade aérea.
Os principais traballos céntranse na mellora estrutural do pavimento da pista, cunha intervención que alcanzará máis dun metro de profundidade en catro zonas concretas, que suman unha superficie superior aos 19.000 metros cadrados. Para a execución desta fase empregarase un total de 73.000 toneladas de asfalto, unha actuación que permitirá alongar a vida útil da pista e adaptala ás necesidades da operativa futura.
O proxecto inclúe tamén a renovación do sistema de balizamento e da drenaxe do campo de voos, co obxectivo de mellorar a eficiencia enerxética da infraestrutura. Neste ámbito, está prevista a instalación de máis de 100 quilómetros de novo cableado, arredor de 900 balizas LED e 6,5 quilómetros de novas canaletas de drenaxe, actuacións que completan unha das intervencións máis relevantes dos últimos anos no aeroporto compostelán.
