A concelleira non adscrita Mercedes Rosón expresou este venres críticas ao anuncio da alcaldesa Goretti Sanmartín de abrir o despacho da Alcaldía dúas veces ao mes para atender á cidadanía. Segundo Rosón, a medida chega “a pouco máis dun ano das eleccións municipais” e interpreta o xesto como o inicio dunha “precampaña longa”, fronte á necesidade, ao seu xuízo, de priorizar a xestión diaria.
As non adscritas sinalan que o anuncio se produce tras “case tres anos de queixas constantes” por parte de asociacións veciñais, representantes de sectores económicos e do tecido cultural e turístico da cidade. Neste contexto, Rosón sostén que gobernar implica escoitar á cidadanía “sempre” e non só nun período próximo aos comicios.
Na súa valoración, a concelleira reclama ao executivo que centre os esforzos en retos inmediatos. Entre eles, cita a declaración de mercado residencial tensionado para conter o prezo do alugueiro, a posta en funcionamento da nova empresa pública de vivenda e solo, o reforzo do control das concesionarias de limpeza e mantemento, o desbloqueo do contrato da auga para estender o saneamento e o abastecemento a todo o termo municipal, así como o inicio dos trámites para a Casa dos Maiores no Ensanche e o polideportivo de Santa Marta.
A crítica das non adscritas tamén incide na ausencia de diálogo previo nalgúns procesos recentes, como a taxa turística ou a modificación do tributo do lixo. Segundo Rosón, neses casos “non se escoitou” nin aos sectores afectados nin á veciñanza, algo que, afirma, se reflicte no volume de alegacións presentadas.
Do mesmo xeito, lembran que esta fórmula de apertura do despacho non se aplicou durante a elaboración dos orzamentos de 2024 e 2025 nin nos do presente exercicio, dos que indican que aínda non existe un borrador completo. Ademais, as concelleiras aluden á falta de diálogo con persoal de servizos municipais, como os centros socioculturais —que denuncian impagos reiterados— e as instalacións deportivas xestionadas por XADE ante o remate da concesión.
