O grupo Benestar–laboratorio BAP (Brain and Pain), integrado no Instituto de Psicoloxía da USC (IPsiUS), porá en marcha un curso dirixido ao estudantado dos graos de Psicoloxía, Medicina, Odontoloxía e Enfermaría co obxectivo de reforzar a formación en ciencia da dor e no seu manexo clínico. A iniciativa responde á detección dunha carencia nos plans de estudo actuais, xa que, segundo explican dende o propio grupo investigador, “a formación en dor é unha lagoa nos ensinos de grao”.
A actividade formativa pretende proporcionar unha base sólida sobre os mecanismos neurofisiolóxicos da dor e os procesos implicados na súa cronificación, ao tempo que introduce ao alumnado nas principais abordaxes terapéuticas da dor crónica. O curso aposta por un modelo biopsicosocial, no que se presentará a evidencia científica dispoñible e se fará fincapé na relevancia da educación en ciencia da dor tanto para profesionais como para pacientes.
Xunto ás sesións expositivas, o programa inclúe contidos prácticos orientados ao coñecemento de técnicas específicas de avaliación da dor e ao uso de procedementos de neuromodulación, como o manexo de equipos de neuroestimulación cerebral. O obxectivo final é dotar os futuros profesionais das ciencias da saúde de ferramentas que lles permitan un manexo máis efectivo e baseado na evidencia da dor crónica, superando aproximacións exclusivamente biomédicas.
O curso desenvolverase no marco do proxecto europeo Painless Horizonte Europa e é convalidable cun crédito de libre configuración. O prazo de inscrición permanecerá aberto ata o 13 de xaneiro, e o proceso debe realizarse a través da secretaría virtual da Universidade de Santiago de Compostela, dentro do apartado de Actividades de recoñecemento ECTS nos graos.
