Os sindicatos Comisións Obreiras, UXT e CIG convocaron unha manifestación este venres en Santiago de Compostela para esixir avances na negociación do convenio colectivo do sector do transporte de viaxeiros por estrada na provincia da Coruña. A mobilización partirá ás 11:00 da Estación Intermodal de Santiago de Compostela e finalizará diante do Parlamento de Galicia.
Segundo trasladou CC.OO. nun comunicado, a protesta enmárcase nun novo ciclo de presión sindical tras os paros realizados no mes de decembro. En asemblea, as organizacións acordaron novas xornadas de paro para os días 12, 13, 16, 19, 20 e 23 de xaneiro, co obxectivo de desbloquear unha negociación que consideran estancada.
Os sindicatos advirten de que, de non producirse cambios na posición empresarial, o conflito podería intensificarse. “Se a patronal persiste no seu inmobilismo, a partir do 2 de febreiro os traballadores irán á folga indefinida”, sinala CC.OO., que cualifica a situación actual como un punto de inflexión tras varios meses sen avances.
Entre os motivos das mobilizacións, a central sindical apunta ao “secuestro” do convenio colectivo, que, segundo explica, leva catro anos paralizado e atópase “desfasado” respecto ás condicións actuais do sector. CC.OO. critica que a única proposta relevante presentada pola patronal sexa unha subida salarial do 1,2%, sen avances en materia de xornada laboral, un incremento que cualifica de “miserable” por considerar que “insulta” ao persoal.
As organizacións convocantes reclaman unha subida salarial “digna”, a reducción da xornada, así como a actualización e modernización dos permisos retribuídos e dos días de asuntos propios, entre outras demandas. A mobilización deste venres pretende visibilizar o conflito no centro político galego e reforzar a presión para reactivar unha negociación que afecta a milleiros de traballadores e traballadoras do transporte de viaxeiros na provincia da Coruña.
