O Concello de Santiago de Compostela habilitará servizos especiais de transporte urbano con motivo do vindeiro partido do Monbus Obradoiro, que se disputará este domingo 28 de decembro ás 18:00 no Multiusos Fontes do Sar.
Segundo a información facilitada polo Concello, establecerase un servizo lanzadeira de autobús entre a rúa da Rosa e o recinto deportivo a partir das 17:00, co obxectivo de facilitar os desprazamentos das persoas asistentes ao encontro.
Ademais, a liña C11 (circular de Fontiñas) realizará acceso directo ao Fontes do Sar en varias das súas viaxes. En concreto, está previsto o paso polo ámbito do pavillón nas expedicións con horario aproximado por Xeneral Pardiñas ás 16:55, 17:15 e 17:35. As paradas máis céntricas dende as que se poderá coller esta liña sitúanse na praza de Galicia, na rúa da Ensinanza e na rúa Virxe da Cerca.
Ao remate do partido, o Concello manterá operativo o servizo lanzadeira de regreso, que realizará o percorrido inverso con destino á rúa da Rosa, co fin de favorecer unha saída escalonada e reducir o uso do vehículo privado na contorna do pavillón.
Dende o goberno local recoméndase o uso do transporte público para asistir ao evento deportivo, especialmente tendo en conta a previsión de afluencia de público e as limitacións de estacionamento nas inmediacións do Fontes do Sar.
