O Partido Popular de Santiago celebrou que no último Pleno municipal se acadase o compromiso do Goberno local, formado por BNG e Compostela Aberta, para permitir a reincorporación do voluntariado do Refuxio de Animais de Bando. Segundo denunciou o PP nun comunicado, os voluntarios foran “expulsados coa desculpa dun cambio de fechaduras”, unha decisión que consideran tomada de maneira unilateral e sen coñecemento do Padroado.
Os populares tamén reclaman explicacións ao Executivo local por “ocultar” ao Padroado o procedemento de adopción iniciado para o can Gosu por parte dunha asociación protectora integrada neste órgano. Segundo o PP, este procedemento contaba coa posibilidade legal de levarse a cabo e con informes favorables, pero non foi comunicado á institución que dirixe o Padroado.
O concelleiro do PP Adrián Vila sinalou no Pleno que o Goberno municipal debe asumir as súas responsabilidades como presidencia do Padroado, función que exerce a alcaldesa, Goretti Sanmartín. Vila asegurou que esta ocultación tivo consecuencias graves, xa que derivou no sacrificio dun dos cans aloxados no refuxio “sen que se fixese un traballo previo sobre a súa conduta”.
