O Salón Nobre do Pazo de Raxoi foi escenario dun acto institucional de recoñecemento ao persoal municipal que se xubila ao longo deste ano, unha cita presidida pola alcaldesa de Santiago, Goretti Sanmartín, e á que asistiron membros da Corporación Municipal. O encontro serviu para expresar publicamente o agradecemento do Concello ás persoas traballadoras que culminan a súa traxectoria profesional na administración local.
Durante o acto, a alcaldesa e os distintos concelleiros e concelleiras fixeron entrega de placas conmemorativas ao persoal xubilado presente, como símbolo de recoñecemento polos anos de dedicación ao servizo público. Sanmartín destacou o papel desenvolvido por estas persoas na mellora do funcionamento municipal e no avance das condicións de vida da veciñanza de Santiago, subliñando o seu compromiso co interese xeral ao longo de décadas de traballo.
Na súa intervención, a alcaldesa fixo tamén referencia a algúns dos fitos acadados no último ano, entre eles a recuperación das estatuas do Mestre Mateo para o patrimonio municipal, como exemplo do traballo colectivo realizado desde o Concello. No plano persoal, Sanmartín desexou ás persoas que acceden á xubilación que o ano 2026 chegue con “moi boa estrela” e despediunas cunha mensaxe de ánimo para esta nova etapa vital: “Moi feliz nova vida”.
As persoas que se xubilan este ano no Concello de Santiago son Manuel Baños, Jesús Barreiro, Jesús Miguel Blanco, José Luis Bello, José Antonio Berdullas, Blanca Bueno, José Camino, Jesús Capeáns, Víctor Carballido, Carmen Conde, Carmela Domínguez, María Teresa Espinosa, Raúl Fidalgo, Lourdes Grobas, Elisabeth Lado, Juan Carlos López, Mª Manuela Mariño, Luis Mariño, José Méndez, Manuel Míguez, José Carlos Miramontes, Juan Ángel Noya, Manuela Pardal, Mª Ángeles Pellit, José Antonio Pena, Pilar Sabio, Paulino Sánchez, Santiago Tojo, Juan Carlos Tomé, Concepción Vales e Antonio Vez.
