O Grupo Municipal Socialista de Santiago denunciou a “inacción e a lentitude inxustificable” do goberno municipal na tramitación de dous expedientes que considera fundamentais para o funcionamento e a consolidación do centro biotecnolóxico da Sionlla, unha infraestrutura vinculada á innovación e ao desenvolvemento económico da cidade.
A concelleira socialista Marta Abal advertiu de que permanecen sen resolver dous procedementos administrativos que cualificou de básicos: por unha banda, a devolución dun aval superior aos 83.000 euros e, pola outra, a autorización dunha hipoteca que, segundo indicou, resulta imprescindible para garantir a viabilidade do proxecto. Segundo explicou, ambos trámites continúan paralizados “sen explicación algunha” por parte do Concello.
Abal lembrou que o centro biotecnolóxico da Sionlla leva en funcionamento desde febreiro de 2023, con empresas xa instaladas e desenvolvendo a súa actividade. Neste contexto, sinalou que “non se entende como o Concello segue a paralizar procedementos vitais para un proxecto estratéxico para a cidade”, ao tempo que cualificou de preocupante a ausencia de respostas do goberno municipal sobre cuestións que, ao seu xuízo, deberían estar resoltas desde hai meses.
Desde o Grupo Municipal Socialista insisten en que a situación afecta tanto ás empresas implantadas no centro como ao propio proxecto e ao conxunto da cidade. “Esiximos respostas e solucións inmediatas”, afirmou a concelleira, quen concluíu que “as empresas, o proxecto e Santiago non poden seguir pagando a falta de xestión e a inacción do goberno municipal”.
