A concelleira do Grupo Municipal Socialista de Santiago, Marta Abal, esixiu ao Goberno local que fixe unha data para a reapertura da piscina do complexo deportivo de Santa Isabel, pechada desde o pasado 1 de xuño debido á execución de obras nas instalacións.
Segundo informou o PSdeG a través dunha nota de prensa, Abal presentou unha pregunta no Pleno municipal coa finalidade de obter unha resposta concreta sobre o calendario das actuacións e a previsión de volta ao uso normal da piscina, unha das infraestruturas deportivas máis utilizadas da cidade.
A edil socialista advertiu das consecuencias que está a ter o peche prolongado da instalación, tanto para as persoas usuarias habituais como para os clubs deportivos. Neste sentido, sinalou que a situación está a xerar “molestias constantes” e puxo como exemplo ao Waterpolo Santiago, que actualmente “non dispón dunha instalación onde adestrar” no municipio.
Abal lembrou tamén que, a finais do pasado mes de agosto, o Goberno local asegurara que as obras avanzaban “a bo ritmo”. Porén, segundo indicou, varios meses despois “continúa a incerteza” arredor da reapertura, ao tempo que criticou que o executivo municipal leve tempo “evitando ofrecer prazos concretos” sobre o remate das actuacións.
Por este motivo, a concelleira reclamou ao Goberno local “transparencia e unha resposta clara” sobre o estado real das obras no complexo deportivo de Santa Isabel, ao considerar que “a cidade merece rigor e planificación, non improvisación”.
