O comité de empresa de Alcampo en Compostela, no Centro Comercial Área Central, con representación sindical de UGT, anunciou a convocatoria de mobilizacións en resposta á decisión da empresa de abrir en festivos durante o verán, tras a aprobación do calendario laboral pola Xunta de Galicia. En concreto, o calendario inclúe os domingos 26 de xullo e 15 de agosto, datas que, segundo o sindicato, viñan sendo respectadas no sector, especialmente en Santiago de Compostela, coincidindo coa celebración do 25 de xullo, día do patrón da cidade.
Desde UGT sinalan que esta medida afecta directamente á conciliación da vida laboral e familiar das persoas traballadoras do comercio. Segundo trasladou o comité de empresa, os festivos representan un tempo destinado ao descanso e á vida persoal, unha circunstancia que —afirman— non está a ser tida en conta pola dirección da compañía.
O órgano de representación do persoal explica que tentou negociar coa empresa unha alternativa á apertura en festivos. Entre as iniciativas impulsadas figura a solicitude dunha mediación a través do Consello Galego de Relacións Laborais, un proceso que finalmente foi rexeitado pola dirección de Alcampo en Compostela, segundo indica a organización sindical.
UGT advirte de que a apertura comercial en días festivos incrementa a carga de traballo, favorece as xornadas partidas e aumenta a eventualidade, o que, ao seu xuízo, contribúe á precarización das condicións laborais no sector. Por este motivo, o comité defende que calquera traballo en festivo debe garantir a voluntariedade, unha compensación en descanso equivalente e unha retribución axeitada.
No comunicado, o comité de empresa expresa tamén o seu pesar polas molestias que as mobilizacións poidan causar á clientela do establecemento. Ao mesmo tempo, solicita comprensión á cidadanía, argumentando que a protesta responde á necesidade de compatibilizar a vida familiar coa laboral nun sector que cualifican de horarios amplos e que —segundo indican— benefician principalmente ás grandes multinacionais da distribución comercial.
