Máis de 400 persoas asistirán desde este xoves, día 2, e ata o sábado, 4 de maio, á primeira edición do Congreso Nacional de Psicoloxía de Emerxencias. O mesmo celebrarase baixo o lema ‘Sostendo emocións nas emerxencias’, organizado polo Colexio oficial de Psicoloxía de Galicia (COPG), en Santiago de Compostela.
“Un congreso pioneiro dentro da psicoloxía de emerxencias e catástrofes, co obxectivo de explorar tanto o dereito á atención en situacións críticas, como as diferentes casuísticas coas que se atopan habitualmente, así como os retos e desafíos deste ámbito de intervención“, explican. Trescentos profesionais asistirán ao encontro de maneira profesional, ao que se unirán máis de cen persoas a través do streaming. Terá lugar en dúas sedes, no Pazo de Fonseca e na Facultade de Psicoloxía da Universidade de Santiago de Compostela, coa participación de 44 expertos e expertas deste ámbito.
O xoves darán comezo as actividades cunha visita á Axencia Galega de Emerxencias (Axega) e a primeira conferencia pola tarde, así como talleres. O venres, día 3, no Pazo de Fonseca, será a conferencia inaugural a cargo de Miguel Anxo García Álvarez, psicólogo clínico, ex presidente do Colexio oficial de Psicoloxía de Galicia e un dos primeiros coordinadores do Grupo de Intervención Psicolóxica en Catástrofes e Emerxencias do COPG.
