O presidente do PP de Santiago, Borja Verea, urxiu ao executivo de BNG e Compostela Aberta a definir con claridade cal é a súa visión sobre o turismo na cidade, nun contexto no que o sector leva meses advertindo de descensos continuados na actividade. O portavoz popular asegurou que as cifras dende o verán “preocupan” e que “son os peores datos dos últimos cinco anos”, polo que pediu ao Concello accións inmediatas de respaldo ás empresas e profesionais vinculados ao sector.
Verea cuestionou se o goberno local considera ou non que existe un problema coa afluencia de visitantes. “Se realmente cren que a cidade está saturada, que o expliquen. Queremos saber se queren menos turistas, si ou non”, afirmou. O líder popular criticou que, ao seu xuízo, o executivo municipal envía sinais contraditorias, xa que “cando hai un mes bo saen a atribuírse a mellora, pero cando as cifras son negativas minimízanse”.
O portavoz do PP defendeu que Santiago mantén dende hai séculos unha relación singular coa chegada de persoas doutros lugares, algo que considera parte central da súa identidade: “Somos unha cidade que naceu para recibir xente e non compartimos que exista un problema cos visitantes, como pode suceder noutros destinos moi masificados”. Nesa liña, sostivo que cada persoa que chega “constrúe cidade” e que o turismo forma parte da vida económica, social e cultural compostelá.
O tamén deputado autonómico asegurou que os datos de ocupación hoteleira publicados para a ponte de decembro avalan a preocupación do sector, que fala de perdas e dunha caída de reservas respecto a anos anteriores. “Os hostaleiros recoñecen que nunca tiveron cifras tan baixas”, afirmou, acusando ao goberno local de “negar unha realidade teimuda”.
Verea insistiu en que a industria turística “non pode quedar á deriva” e pediu que se adopten medidas de apoio de maneira inmediata. Tamén advertiu de que, ao seu entender, a falta de reacción do executivo local está a deteriorar un sector que consideraba consolidado: “Están conseguindo algo que ninguén pensaba que podería ocorrer: danar unha industria de enorme peso para Compostela”.
Finalmente, mostrou preocupación pola lectura que o goberno fai dos datos oficiais, comparando a cidade con concellos da contorna. “Compostela é unha capital de proxección internacional e non pode analizarse con parámetros locais”, afirmou, reclamando de novo “coherencia e claridade” sobre o modelo turístico que o Concello quere impulsar.
