A reunión do Consello Municipal de Igualdade, presidida este venres pola alcaldesa Goretti Sanmartín, serviu para facer público o balance anual da Casa Xohana Torres, un espazo que, segundo explicou, entrou nunha nova etapa coa posta en marcha do servizo de asesoramento LGBTIQ+. A rexedora cualificou o centro como un “espazo dinámico”, salientando o ritmo constante de accións e a consolidación dun programa mensual cunha media de cinco actividades enfocadas na formación, a saúde sexual e a creación con perspectiva de xénero.
Os datos referidos ao período entre maio e outubro mostran un incremento notable da actividade: 62 consultas, 38 solicitudes de uso, 21 actividades abertas, 20 accións internas e 1.959 comunicacións atendidas. Ademais, o espazo foi cedido en 41 ocasións para iniciativas de entidades e colectivos. O novo servizo LGBTIQ+, que combina atención psicolóxica e asesoramento xurídico, comezou a funcionar en xuño e xa acumula unha demanda sostida.
Dentro das liñas de traballo abertas pola Casa Xohana Torres, o Concello mantén en marcha unha investigación sobre percepcións da mocidade en relación ás violencias machistas e ás relacións afectivas, a través dun cuestionario enviado a institutos e centros de FP co obxectivo de analizar tendencias sociais e reforzar a produción de coñecemento feminista.
No que atinxe ao Centro de Información ás Mulleres (CIM), o balance entre o 1 de xaneiro e o 31 de outubro recolle a atención a 202 mulleres. Sanmartín subliñou que 2025 estivo condicionado pola implantación avanzada do Sistema VioXen2, que permite integrar datos en tempo real e mellorar a coordinación entre institucións, acelerando a resposta en casos de violencia machista e reforzando a protección das vítimas e das súas crianzas.
CAMPAÑAS E ACCIÓNS MUNICIPAIS AO LONGO DO ANO
O Concello repasou tamén as campañas de sensibilización desenvolvidas en 2025. Co gallo do 8M, impulsouse ‘Construamos o termo feminista de Compostela’, acompañada dunha revista específica, materiais gráficos e actos como a homenaxe ás Mulleres de Compostela 2025 e a entrega do Premio Xohana Torres 2024.
Durante a Ascensión e o Apóstolo, instaláronse Puntos Lila en zonas de lecer para ofrecer información, acompañamento seguro e recursos fronte ás violencias sexuais. A valoración municipal foi “moi positiva” pola utilidade destes dispositivos.
Entre finais de maio e xuño, Compostela Diversa volveu converter a cidade nun referente na visibilización dos dereitos LGTBI, cunha participación de preto de 200 establecementos comerciais, hoteleiros e hostaleiros. O Concello destacou que esta iniciativa reforza un compromiso iniciado en 2018 e que xa forma parte da identidade reivindicativa da cidade.
A programación anual incluíu tamén accións polo Día Europeo contra a Trata de Persoas, cun punto informativo no Toural e a representación teatral Atrapadas, centrada na experiencia de mulleres refuxiadas vítimas de explotación.
O ciclo pechouse co 25N, cunha campaña que puxo o foco na violencia dixital entre a mocidade baixo o lema ‘Non é un trend, é violencia dixital’. A iniciativa puxo o acento en novas formas de agresión presentes nas redes sociais, como o sexpreading, o acoso continuado, a humillación pública ou a difusión de expresións misóxinas normalizadas.
Con este balance, o goberno municipal defendeu que Compostela mantén unha liña de reforzo estrutural das políticas de igualdade, ampliando servizos, mellorando a coordinación institucional e incorporando novas ferramentas de prevención dirixidas ás xeracións máis novas.
