O PSdeG de Santiago chamou este sábado a adoptar medidas inmediatas ante o que cualifica como un novo episodio de saturación nas urxencias do Complexo Hospitalario Universitario de Santiago (CHUS). O secretario xeral dos socialistas composteláns, Aitor Bouza, compareceu fronte ao centro para denunciar a “situación estrutural” que, ao seu xuízo, se repite semana tras semana e que “prexudica ás veciñas e veciños da comarca”.
Bouza sostivo que nas últimas xornadas se reproduciron escenas de atención en corredores, con pacientes pendentes de traslado por falta de efectivos e con demoras nas ambulancias. Segundo explicou, “non é un episodio puntual” e relacionou esta situación coa dificultade para conseguir cita en atención primaria, que, segundo asegurou, chega a alongarse ata tres semanas. Este prazo, engadiu, empurra a moitas persoas a acudir directamente ás urxencias.
Ante este panorama, o responsable socialista reclamou responsabilidades políticas e pediu o cesamento inmediato do xerente do Sergas, ao considerar que “non está a dar resposta ás necesidades da área sanitaria de Santiago e Barbanza”. Bouza afirmou que “os recortes” e a “falta de previsión” explican a saturación actual.
Tamén convidou ao presidente da Xunta, Alfonso Rueda, a achegarse ao CHUS para “ver de primeira man” a situación, ao tempo que criticou que o Goberno galego “negue o colapso”. “Os vídeos e imaxes publicadas nos últimos días amosan o que está a pasar”, sinalou.
Bouza defendeu tamén a necesidade de escoitar ao persoal sanitario, ao que cualificou de “principal coñecedor do estado real do sistema”. Subliñou que denunciar a saturación “non é un ataque aos profesionais”, senón “a defensa da súa dignidade e da das persoas que acoden ao hospital”.
Os socialistas avanzaron que manterán a presión política e institucional para que se adopten “solucións efectivas” e se recupere a calidade asistencial na área sanitaria compostelá.
