A residencia DomusVi San Lázaro, situada no barrio compostelán de San Lázaro, confirmou unha incidencia técnica no seu servidor central tras as críticas lanzadas esta semana por Comisións Obreiras (CCOO). A empresa recoñece que o equipamento sofre unha avaría eléctrica irreparable e que deberá ser substituído completamente, un proceso que o provedor prevé completar antes de finais de 2025.
Segundo DomusVi, a falla afecta unicamente ao sistema de chamada paciente-enfermeira e ao control de acceso das portas internas, pero non altera outras dotacións do centro. Con isto, a compañía rebate as afirmacións do sindicato, que atribuía ao “colapso” do servidor repercusións máis amplas no funcionamento da residencia.
As críticas foran trasladadas polo presidente do comité de empresa e delegado de CCOO, Isabel Salgado, quen tamén advertía dunha suposta “escaseza de persoal” que estaría a deteriorar a atención ás persoas usuarias. No seu comunicado mencionaba problemas como falta de hixiene, incidencias alimentarias e a aparición de patoloxías infecto-contaxiosas, entre elas sarna e conxuntivite.
Fontes da empresa consultadas por Europa Press negan categóricamente estes extremos. Aseguran que non existe actualmente déficit de persoal, que non se deron casos de sarna e que os residentes reciben unha atención “debidamente prestada” tanto no ámbito alimentario como nos coidados diarios. Consideran “intolerable” que se cuestione o labor do persoal do centro.
Respecto á conxuntivite vírica, DomusVi admite que apareceron “algúns” casos a finais do verán, pero subliña que a situación foi controlada, activándose de inmediato os protocolos de prevención e seguimento clínico. Engaden que as autoridades competentes, as familias e o persoal foron informados “con transparencia” e que o episodio quedou “resolto de forma favorable”.
No tocante á avaría, CCOO vinculaba o fallo do servidor co uso de alternativas improvisadas, como culleres para golpear as paredes en substitución dos timbres. A empresa non confirma este punto, pero si explica que, ao detectar a incidencia, o centro notificou o problema ao provedor de mantemento, que determinou a necesidade de substituír todo o sistema. Durante este período, pídese ao persoal incrementar as tarefas de vixilancia, e a situación foi comunicada ás familias e ás administracións.
DomusVi asegura que o orzamento para a reparación xa está aprobado e que a renovación do sistema será executada antes de que remate o ano. As mesmas fontes insisten en que a residencia mantén o seu compromiso coa “transparencia” e coa “calidade asistencial” das persoas usuarias.
