O Concello de Santiago vén de emitir o seu informe no trámite de consultas previas do Plan de interese autonómico (PIA) do futuro parque empresarial de Lavacolla. O departamento de Planeamento e Xestión do Territorio, dirixido por Iago Lestegás, conclúe que a documentación presentada pola promotora presenta carencias substanciais e precisa ser corrixida antes de continuar coa tramitación ambiental.
Segundo a resolución municipal, o ámbito proposto “carece por completo de servizos” e non incorpora unha análise sobre as infraestruturas imprescindibles para facelo viable, entre elas a depuración de augas ou as conexións viarias. O servizo técnico lembra que sen estes investimentos previos “difícilmente vai poder implementarse un parque empresarial de interese autonómico”, e que non existe unha avaliación económica do custo das actuacións nin se aclara quen asumiría os gastos. Para o Concello, esta estimación debe presentarse xa nesta fase do PIA, e non remitirse a estudos posteriores.
O informe tamén subliña que calquera iniciativa deste tipo debe acreditar a súa sustentabilidade económica a longo prazo e garantir que non supoña unha carga para as arcas municipais. Neste sentido, o documento considera que a promotora tampouco xustifica a adecuación da súa proposta aos requisitos legais da Lei 1/2021, relativa á inserción territorial e á viabilidade para as facendas locais.
No apartado territorial, o Concello destaca que o plan se limita a formular unha ordenación interna sen analizar a súa relación co viario supramunicipal. Entre os condicionantes salientan a presenza das autovías A-54 e SC-21, a proximidade do aeroporto e, sobre todo, o paso do Camiño Francés polo límite sur-leste da área. A resolución advirte que non se describen os camiños existentes nin se define sequera o trazado do itinerario xacobeo, polo que considera que o Documento Ambiental Estratéxico non ofrece un estudo axeitado para valorar alternativas.
O Concello defende como opción preferente a ordenación prevista no PXOM vixente, compatible co Plan Sectorial de Ordenación de Áreas Empresariais, ao entender que permitiría desenvolver o solo sen cruzar o Camiño Francés con tráfico pesado e evitando sobrecargar a antiga N-634, xa ao límite da súa capacidade. Ademais, calquera modificación nos enlaces coas vías estatais debe ser consensuada coa Administración Xeral do Estado.
A falta de identificación dos elementos naturais e territoriais da zona é outro dos aspectos sinalados. O informe expón que non se detallan as características do territorio nin se avalían as condicións físicas que condicionan o deseño do parque.
En conxunto, o Concello conclúe que a documentación aportada “non é o suficientemente completa nin precisa” como para poder continuar coa avaliación ambiental. Por iso, insta á promotora a completar ou reformular o proxecto e abrir un novo período de exposición pública e consultas unha vez se presente a nova información.
