O voceiro municipal do PSdeG, Aitor Bouza, defendeu este xoves a necesidade de activar un plan específico de mellora das infraestruturas deportivas de Santiago, e reclamou que a Xunta de Galicia se implique de maneira directa nunha cuestión que, segundo afirmou, preocupa tanto ás entidades como á veciñanza da cidade. Bouza enmarcou esta demanda nunha comparecencia na que tamén avanzou que o grupo socialista rexistrará iniciativas para aclarar un recente caso coñecido na AP-9, no que un ferido tivo que agardar hora e media pola chegada dunha ambulancia. “Queremos acceso a toda a documentación para coñecer que ocorreu”, apuntou.
Durante a súa conferencia de prensa, Bouza centrouse na situación das instalacións deportivas compostelás. Asegurou que moitos clubs lle trasladan “a falta de espazos e o deterioro das dotacións existentes”, polo que defendeu que é preciso abordar un investimento amplo e coordinado. Segundo explicou, o PSdeG presentou no Parlamento unha serie de enmendas aos orzamentos autonómicos de 2026 co fin de que a Xunta habilite fondos para actualizar pavillóns e outras infraestruturas da cidade.
O concelleiro advertiu de que, ao seu xuízo, existe un risco de que os investimentos dependan “de quen goberne en cada concello”, polo que pediu a Alfonso Rueda que “non discrimine a Santiago” e comprometa recursos con independencia da cor política. Tamén dirixiu unha mensaxe ao líder do PP local, Borja Verea, sobre quen preguntou se defenderá ante o Goberno galego “as necesidades reais da cidade” ou se “volverá dar as costas” a estas peticións.
Bouza lembrou que, nestes momentos, a Deputación da Coruña é “a única administración allea ao Concello” que está a achegar financiamento para obras deportivas en Santiago. Por iso insistiu en que o executivo municipal debe reclamar á Xunta que se sume a estes esforzos, en cumprimento do acordo alcanzado no mandato anterior para elaborar un plan conxunto de infraestruturas. Nesta liña, pediu ao goberno que lidera Goretti Sanmartín que “sexan claros” sobre se teñen previsto activar esa vía.
O portavoz socialista aludiu tamén ao compromiso electoral do BNG de iniciar o procedemento para que Santiago aspirase ao título de ‘Cidade Europea do Deporte’, un proceso que, segundo subliñou, “segue sen arrincar malia teren pasado case tres anos de mandato”. Considera que esta oportunidade permitiría atraer competicións e promover a actividade física na cidade.
A comparecencia concluíu cun chamamento a que se garanta unha planificación estable que permita impulsar “deporte aquí e en condicións adecuadas”, con instalacións actualizadas e recursos suficientes para responder á demanda existente.
