A Praza do Toural acolleu este venres a carpa informativa da Asociación Compostelá de Diabéticos, instalada en colaboración co Concello de Santiago con motivo do Día Mundial da Diabetes. Alí acudiron a alcaldesa, Goretti Sanmartín, e a primeira tenenta de alcaldesa, María Rozas, para coñecer o labor divulgativo da entidade e respaldar a campaña de sensibilización dirixida á veciñanza.
Durante a visita, Sanmartín destacou a importancia de promover hábitos de vida saudables e convidou á cidadanía a achegarse ao posto para recibir información e asesoramento. A rexedora subliñou que iniciativas como esta contribúen a reducir os riscos asociados “a esta doenza silenciosa” e reforzan o papel do asociacionismo na difusión de actividades enfocadas na prevención e no coidado da saúde.
