O BNG de Teo confirmou a incorporación de Almudena Taboada como nova concelleira da formación, despois de que Noelia Castaño comunicase a súa dimisión por razóns persoais e profesionais. A decisión foi trasladada pola propia Castaño na asemblea local, nunha intervención na que expresou o seu agradecemento pola confianza recibida e a súa vontade de seguir colaborando co grupo municipal.
A renuncia de Noelia Castaño abre paso a Almudena Taboada, veciña do concello e coñecida pola súa participación en colectivos sociais, asociacións e ANPAs tanto de centros de ensino primario como secundario. Concorrera ás eleccións municipais ocupando o cuarto posto da candidatura nacionalista e forma parte do equipo organizativo do BNG tanto na localidade como na comarca.
Segundo explicou a edil saínte, os seus compromisos persoais e profesionais dificultaban a compatibilidade co ritmo da actividade municipal. Aínda así, subliñou o seu compromiso político e a intención de seguir apoiando o traballo do grupo. “A disposición a colaborar seguirá aí”, trasladou durante a reunión.
Pola súa banda, Almudena Taboada expresou a súa intención de dar continuidade ás liñas de acción impulsadas por Castaño e de reforzar o labor do BNG na defensa dos intereses da veciñanza. “Continuarei o traballo desenvolvido por Noelia Castaño e sumarei forzas para esixir que a actividade municipal reverta na mellora da vida da veciñanza de Teo”, afirmou.
O relevo producirase unha vez se complete a tramitación administrativa necesaria para a toma de posesión da nova acta de concelleira. O BNG teense destaca que a incorporación de Taboada permitirá manter o ritmo de traballo e as prioridades marcadas polo grupo na corporación municipal.
