A Selección Galega de Fútbol superou este martes á SD Compostela por 2-0 nun encontro amigable disputado no campo de Vista Alegre, en Ordes. O partido serviu como ensaio xeral antes da fase nacional da Copa das Rexións UEFA, que o combinado autonómico afrontará a finais de mes en Palencia.
O duelo estivo marcado pola igualdade e pola escaseza de ocasións, pero a selección que adestra Manolo García logrou imporse grazas a un penalti transformado por Noel, do Juventud Cambados, na segunda metade, e a un tanto final de Adri Rodríguez, do Céltiga. O técnico galego aproveitou o encontro para repartir minutos entre todos os xogadores convocados e probar variantes tácticas ante un rival de nivel como o Compos, un dos aspirantes ao ascenso en Segunda RFEF.
Con este resultado, Galicia mantén as boas sensacións previas á competición oficial, onde se enfrontará a Andalucía e Castela e León na primeira fase nacional. A vixente campioa europea debutará o sábado 29 de novembro ás 12:00 no estadio Mariano Haro de Becerril de Campos fronte a Andalucía, mentres que o segundo encontro terá lugar o domingo 30, á mesma hora, no campo da Balastera de Palencia.
O primeiro partido do grupo, entre Andalucía e Castela e León, abrirá o campionato o venres 28 de novembro, marcando o inicio dunha nova edición da competición que reúne ás mellores seleccións rexionais do Estado.
