Máis de douscentos empresarios, directivos e profesionais dos ámbitos educativo, sanitario e tecnolóxico participan hoxe e mañá no seminario ‘Ética e IA. A intelixencia artificial cambia ou transcende a persoa?’, organizado polo Arcebispado de Santiago en colaboración co empresariado galego.
O encontro, que pretende abrir un espazo de reflexión sobre como a intelixencia artificial afecta á formación, ao exercicio profesional e á vida diaria, comeza este xoves coa Misa do Peregrino ás 19:30 na Catedral de Santiago, na que o presidente da Confederación de Empresarios de Galicia (CEG), Juan Manuel Vieites, realizará a ofrenda ao Apóstolo.
Tras a cerimonia, os asistentes trasladaranse á igrexa de San Martiño Pinario, onde o Orfeón e a Orquestra Terra a Nosa ofrecerán un concerto baixo a dirección de Luís Martínez. O programa inclúe o Magníficat en Do menor de Giovanni Battista Martini e o Réquiem KV626 de Mozart na versión revisada por Spengel en 1852, con interpretación dos solistas Aida López, Julia Portela, David Ferreiro e Pablo Nieves.
As sesións académicas desenvolveranse o venres 7 de novembro na Hospedería de San Martiño Pinario, cun programa de conferencias e mesas de diálogo que reunirán especialistas de recoñecido prestixio. A inauguración terá lugar ás 09:30, seguida da conferencia de apertura da filósofa Adela Cortina, titulada “Ética e ideoloxía na IA”.
Posteriormente intervirán Senén Barro, Amparo Alonso, Teresa Rodríguez de las Heras e Ulises Cortés, que abordarán cuestións como o desenvolvemento da IA en España, a estratexia estatal, a gobernanza e o papel da educación e os valores.
Ás 12:30 celebrarase un diálogo sobre ‘A Igrexa e a IA’, no que participarán o arzebispo de Santiago, Francisco Prieto, o teólogo estadounidense Alberto Embry e o sacerdote e investigador Ricardo Mejía, moderados por José Ramón Amor Pan, da Fundación Pablo VI.
O seminario pecharase cun debate sobre responsabilidade, regulación e globalización da IA, moderado por Eladio Dapena, da Universidade Intercontinental da Empresa, e co acto de clausura previsto para as 14:15.
Entre os asistentes figuran representantes da Xunta de Galicia, Deputación da Coruña, Abanca, Umas, universidades galegas e estatais, así como membros das Cámaras de Comercio de Vigo e Santiago, do Club Financiero de Santiago e de diversas entidades empresariais e profesionais. O evento, segundo a organización, busca integrar a reflexión ética e humanista no avance tecnolóxico, promovendo unha visión responsable e inclusiva da intelixencia artificial.
