A alcaldesa de Santiago de Compostela, Goretti Sanmartín, acompañada por varios membros da Corporación Municipal, recibiu na tarde deste mércores na Casa do Concello un grupo de participantes do congreso internacional ‘Symmetry and Shape’, que reúne na capital galega a investigadores e investigadoras de máis de quince países.
Durante o encontro, Sanmartín reivindicou o papel de Santiago como lugar de coñecemento e de proxección internacional no ámbito das matemáticas, un campo que, segundo subliñou, “mantén en Compostela unha tradición científica con raíces fondas”.
A rexedora lembrou que a cidade acolleu xa no ano 1963 o primeiro coloquio internacional de matemáticas celebrado en España, impulsado polo xeómetra Enrique Vidal Abascal, figura clave na historia da disciplina no país.
Nesta quinta edición de ‘Symmetry and Shape’, Sanmartín destacou tamén a honra que supón para Santiago recibir ao profesor Enrique Olmos, homenaxeado nesta convocatoria e recoñecido internacionalmente polo seu labor investigador. O congreso consolídase así como un punto de encontro de referencia para a comunidade matemática e reforza a imaxe de Compostela como cidade universitaria e científica.
