O reitor da USC, Antonio López Díaz, participou esta semana na novena Asemblea de Reitores e Reitoras da Universidade Europea para o Benestar (EUniWell), celebrada en Colonia. O encontro reuniu a máximos representantes académicos, vicerreitoras, estudantado e persoal das institucións que forman parte da Alianza, centrada na cooperación universitaria europea arredor da investigación, a educación e o benestar social.
A delegación da USC estivo integrada tamén pola vicerreitora de Titulacións e Internacionalización, María José López Couso; a adxunta para Internacionalización, Belén Méndez Naya; o coordinador institucional de EUniWell, José María Miranda Boto, e o estudante Carlos Arjona, representante da universidade compostelá no Consello do Estudantado da Alianza.
Durante a reunión, os reitores e reitoras intercambiaron experiencias sobre a evolución de EUniWell como comunidade colaborativa impulsada pola investigación, que procura vincular o benestar co avance científico e o impacto social. A directora de Desenvolvemento de EUniWell, Beatrix Busse, salientou que “comezamos cunha idea e hoxe somos unha Universidade Europea para o Benestar, preparada para o seguinte capítulo: EUniWell 2030”, en referencia ao novo marco estratéxico do consorcio.
O encontro serviu tamén para avaliar os logros acadados durante o primeiro lustro de funcionamento e para reafirmar o compromiso das universidades integrantes coas tres liñas prioritarias da Alianza: converterse na voz do benestar, consolidarse como Universidade Europea e construír comunidades activas e comprometidas.
A asemblea tivo lugar na véspera dos actos conmemorativos do quinto aniversario de EUniWell, que incluíron a conferencia Celebrating Five Years of EUniWell e o festival FestiWell. Estes eventos reuniron a máis de douscentos representantes das institucións socias e puxeron en valor a contribución da investigación, da educación e do compromiso cívico na construción dun futuro europeo máis sustentable e equitativo.
