O Palacio de Congresos de Santiago de Compostela converterase os días 8 e 9 de novembro no epicentro da cultura dixital galega coa celebración de ‘Píxel á Feira’, o primeiro salón do videoxogo desenvolvido integramente en Galicia. O evento ofrecerá ao público a posibilidade de xogar con máis de vinte videoxogos creados no país, ademais de participar en actividades, torneos, charlas e obradoiros dirixidos a toda a familia.
A iniciativa foi presentada este luns en rolda de prensa polo vicepresidente da Deputación da Coruña, Xosé Regueira, a alcaldesa de Santiago, Goretti Sanmartín, e o comisario do proxecto, Iago Gordillo, quen destacaron o seu carácter gratuíto e divulgativo.
Segundo explicou Regueira, o obxectivo de ‘Píxel á Feira’ é “favorecer que a industria galega sexa capaz de sacar novos produtos á rúa” e fomentar a súa difusión entre o público xeral. Pola súa parte, Gordillo incidiu en que o evento pretende tamén “pór en valor todo o apartado artístico que pode ter un videoxogo”.
A programación inclúe unha zona interactiva de xogo con máquinas recreativas, máis dunha ducia de actividades no Escenario DLC, e a participación de profesionais como Alba Calvo, Fernando Moreiras e Sara Cubelos, que ofrecerán unha visión técnica e creativa da industria.
O salón contará ademais coa exposición do Museo do Videoxogo de Galicia (MUVI), talleres, espectáculos e espazos dedicados á educación, a tradución e ao selo galego no sector do videoxogo. Entre as actividades destacan o concerto ‘Tiaviolí Gaminf’, que combina música e cultura dixital; a charla ‘Arte e historia nos Assassin’s Creed’, a cargo de O Barroquista; o espectáculo de improvisación ‘Impro Gamer’ e o concurso musical Gamesong Trivial Music.
Durante a presentación, Goretti Sanmartín subliñou que Santiago debe aspirar a ser “non só capital do turismo, senón tamén do comercio e, neste caso, do videoxogo”. A rexedora lembrou que o primeiro videoxogo en galego, O misterio das sete pezas, creouse na capital en 2001, o que amosa a vontade da cidade por consolidarse como referente neste ámbito creativo.
Sanmartín defendeu tamén a importancia de incorporar a lingua galega no sector dixital, destacando que proxectos como este “unen o educativo, o lecer e a mocidade, ámbitos nos que é esencial reforzar o uso do galego”. “Moitas familias teñen vontade de que os seus fillos empreguen a lingua, pero ás veces pérdese polo camiño. Este tipo de espazos axudan a recuperala”, concluíu.
