A nova executiva da Real Academia Galega (RAG) mantivo este xoves a súa primeira reunión institucional coa alcaldesa de Santiago, Goretti Sanmartín, un encontro centrado no seguimento do mapa sociolingüístico escolar da cidade e na preparación das Letras Galegas 2026, dedicadas á escritora e xornalista Begoña Caamaño.
Durante a xuntanza, celebrada no Pazo de Raxoi, ambas as partes analizaron o avance do estudo que a RAG desenvolve en colaboración co Concello no marco dun convenio de investigación sociolingüística. Tras a fase de recollida de datos nos centros educativos composteláns, o Seminario de Sociolingüística da Academia traballa agora na elaboración dun informe diagnóstico que servirá de base para novas estratexias de recuperación e mantemento do galego entre a infancia e a adolescencia.
A rexedora destacou a importancia desta colaboración para “coñecer con rigor a realidade lingüística da cidade e deseñar políticas efectivas que favorezan o uso do galego entre as novas xeracións”. Pola súa parte, o presidente da RAG, Henrique Monteagudo, subliñou o compromiso da institución con Santiago “como capital simbólica da lingua e da cultura galegas”.
A reunión serviu tamén para abrir vías de cooperación arredor das Letras Galegas 2026, dedicadas a Begoña Caamaño, autora moi vinculada á cidade, onde residiu desde os anos 90 ata o seu falecemento en 2014. Sanmartín lembrou o seu legado literario e o seu activismo a prol da igualdade e da lingua.
Na cita participaron, ademais da alcaldesa e da concelleira de Capital Cultural, Míriam Louzao, as integrantes da nova executiva da RAG: a secretaria Ana Boullón Agrelo, a tesoureira María López-Sández e a arquiveira-bibliotecaria María Dores Sánchez Palomino. O encontro concluíu coa asinatura de Henrique Monteagudo no libro de honra municipal, simbolizando o inicio dunha nova etapa de colaboración entre o Concello e a Real Academia Galega.
