O Pazo de Raxoi acenderase esta noite de cor morada para conmemorar o Día Mundial do Dó Xestacional, Perinatal e Neonatal, unha xornada dedicada a concienciar sobre a perda dun bebé durante o embarazo ou nos primeiros días de vida e a ofrecer apoio ás familias que atravesan este proceso, moitas veces en silencio.
O Concello de Santiago participa así nunha campaña internacional que busca romper o tabú arredor da morte perinatal e dar visibilidade a unha realidade que afecta cada ano a milleiros de familias. A decisión foi adoptada tras unha reunión entre a concelleira de Dereitos e Servizos Sociais, María Rozas, e representantes das asociacións ‘Mariposas no Ceo’, da Asociación Galega de Familias de Nenos Prematuros (AGAPREM) e da Unidade de Neonatos do CHUS.
Durante o encontro, as entidades trasladaron ao Concello as súas demandas para mellorar os protocolos de atención sanitaria e o acompañamento ás familias. María Rozas destacou que “con este xesto queremos contribuír a visibilizar unha realidade máis frecuente do que se pensa, apoiar a quen vive duelos silenciosos e sumarnos ás súas demandas para garantir unha atención máis respectuosa e personalizada”.
Segundo datos do Ministerio de Sanidade, en España rexístranse cada ano máis de 2.000 mortes perinatais, mentres que en Galicia a taxa é de 3,57 falecementos por cada mil bebés nacidos, segundo o Instituto Nacional de Estatística (INE).
A asociación ‘Mariposas no Ceo’ xurdiu da experiencia persoal de catro nais galegas que perderon os seus fillos e decidiron crear un espazo de apoio mutuo. Desde entón, o colectivo traballa no acompañamento emocional e asesoramento ás familias, así como na mellora dos protocolos do SERGAS, na formación dos profesionais sanitariose na creación de espazos de lembranza que permitan manter viva a memoria dos bebés falecidos.
