O grupo municipal do Partido Popular de Santiago de Compostela reclamou este martes ao Goberno local unha resposta “inmediata e efectiva” fronte ao que consideran un incremento do senfogarismo e dos problemas de convivencia en distintos puntos da cidade. A comparecencia realizouse na Praza de Cervantes, un dos espazos onde, segundo os populares, a situación é máis visible e preocupante nestes momentos.
O portavoz popular, José Ramón de la Fuente, subliñou que “non é comprensible nin explicable que os veciños leven meses padecendo esta situación sen que o Concello fose capaz de artellar unha solución”. Lembrou que o grupo leva “polo menos dous anos advertindo do incremento de situacións que perturban a normal convivencia”, e criticou que “o Goberno local sempre responda negando o problema ou asegurando que non ten solución”.
De la Fuente asegurou que “hai un evidente problema de seguridade e convivencia na cidade” e que este “se ten incrementado nos dous últimos anos”. Entre os exemplos mencionados citou, ademais da Praza de Cervantes, a praza do Toural, a dársena de Xoán XXIII e o Ensanche.
Pola súa parte, a concelleira Yolanda Otero incidiu en que a Praza de Cervantes é “testemuña dunha situación de vulnerabilidade alarmante, de preocupación veciñal e dunha actuación municipal deficitaria”. A edil afirmou que “o senfogarismo, lonxe de diminuír, vai a máis en Santiago” e que afecta tamén a outros puntos como o parque de Galeras, Pontepedriña ou os soportais de Correos.
Segundo Otero, “esta realidade xera unha tensión crecente na convivencia, produce sensación de inseguridade e malestar entre os comerciantes e veciños”. Engadiu que “non estamos a falar de ideoloxías, senón de humanización”, e pediu ao Concello que actúe con urxencia para evitar a cronificación da situación.
A edil lembrou tamén que o Goberno municipal leva “dous anos anunciando a apertura do Centro de Atención Integral de Belvís”, mais “a día de hoxe non temos data para a súa posta en funcionamento”. Por iso, reclamou medidas concretas e inmediatas: “O Concello non pode seguir mirando cara outro lado ante unha problemática social que require respostas reais e recursos específicos para as persoas sen teito”.
O Partido Popular insistiu en que as súas denuncias non buscan xerar alarma, senón “visibilizar un problema humano e social que precisa solucións urxentes”, e pediu que se priorice a atención ás persoas afectadas e a convivencia cidadá.
