O voceiro do grupo municipal socialista de Santiago, Gumersindo Guinarte, censurou este venres o “esperpento político” vivido nas últimas horas en Compostela tras o anuncio dunha suposta moción de censura promovida polo concelleiro non adscrito Gonzalo Muíños.
Segundo explicou Guinarte, “a política municipal transitou nas últimas horas en Compostela dende o enredo ao esperpento”. O edil referiuse así á proposta feita por Muíños, quen “se autoproclamou voceiro dos non adscritos e anunciou o seu apoio a unha moción de censura encabezada por Mercedes Rosón”. Engadiu que, pouco despois, “o Partido Popular, que por suposto se apunta a un bombardeo, dixo que si, que a apoiaba”.
Porén, o voceiro socialista lembrou que “tanto o mentor da moción como a suposta candidata acabaron desmentindo a proposta”, polo que, ao seu xuízo, “só hai dúas posibilidades: ou cando o señor Muíños fixo esa proposta non contou coa anuencia da señora Rosón, ou simplemente buscaba un titular durante unhas horas cunha proposta disparatada”.
Guinarte advertiu que “iso non é facer política seria, iso é facer o ridículo e facerlle o xogo ao Partido Popular”, e apelou a recuperar o sentido institucional.
Desde o grupo municipal socialista sinalaron que “a cidade non merece representantes que antepoñan intereses persoais ou desexos de axuste de contas aos intereses da cidadanía”. Ademais, cualificaron de “insulto á intelixencia” o comportamento dos últimos días, por ser “incoherente dicir que non se entra no debate dunha moción de censura e, ao mesmo tempo, propoñer un nome que só podería prosperar co apoio do PP”.
O PSOE compostelán conclúe que este episodio evidencia unha “preocupante falta de seriedade, de respecto e de sentido común” por parte dalgúns representantes municipais e chama a “recuperar o rigor e a responsabilidade que merece Santiago de Compostela”.
