O Partido Popular de Santiago abriu a porta a negociar unha moción de censura co grupo dos catro concelleiros non adscritos —expulsados do PSOE o pasado verán— co obxectivo de conformar o que denominan un “goberno de emerxencia” na capital galega. A operación permitiría desaloxar do poder á alcaldesa nacionalista Goretti Sanmartín e abriría a posibilidade de que a nova rexedora fose Mercedes Rosón, unha das antigas edís socialistas.
O presidente provincial do PP e conselleiro de Presidencia, Diego Calvo, confirmou este xoves a disposición do seu partido a iniciar conversas, mentres que o portavoz municipal popular, Borja Verea, insistiu en que a súa “única preocupación é Santiago” e non “a cadeira de brazos” da Alcaldía.
Segundo explicou o PP, o plan pasaría por un executivo composto por 15 concelleiros, sustentado sobre un decálogo de medidas urxentes. Entre elas, destacan a derriba da Casa da Xuventude, a eliminación dos cargos de confianza creados polo BNG e Compostela Aberta, e a reorientación deses fondos á programación cultural da cidade.
Outros puntos do documento inclúen o reforzo inmediato do servizo de limpeza, a posta en marcha do novo contrato da auga, que segundo os populares “xeraría 100 millóns de euros para Santiago”, e a auditoría do servizo de transporte urbano.
Tamén propoñen axilizar os trámites urbanísticos e administrativos, crear unha rede pública de cociñas escolares, promover vivenda cem por cento pública e paralizar a venda de solo municipal. Completan o paquete de medidas a construción de parques infantís cubertos e o incremento do persoal da Policía Local, xunto con novas actuacións en materia de seguridade cidadá.
Coa suma dos catro edís non adscritos e os once do PP, a oposición podería acadar a maioría absoluta necesaria para forzar a moción e alterar o mapa político compostelán, actualmente gobernado por BNG e CA en minoría.
